* Artigo de Francisco Albo en La Voz de Galicia, edición Lemos, o 13 de xullo de 2011 (aquí).
Foto: O COLADO DO VENTO. |
Un elemento descoñecido do patrimonio histórico de Sober foi descuberto recentemente na parroquia de Pinol. Trátase dunha figura tallada en baixorrelevo que representa de forma moi esquemática un rostro humano. A talla encóntrase nunha pedra embutida no muro exterior dunha vivenda situada xunto á igrexa románica de San Vicente e ata agora non foi mencionada en ningún inventario do patrimonio nin en calquera outra publicación.
O arqueólogo monfortino Iván Álvarez Merayo sinala que a figura mostra un grande parecido coas representacións de rostros humanos que poden verse en diversos relevos castrexos de Galicia e do norte de Portugal. «Se a peza tivese aparecido nun castro, non tería ningunha dúbida en rotulala como un baixorrelevo castrexo -afirma-, pero como apareceu noutro contexto iso xa non se pode afirmar con seguridade». Álvarez apunta a este respecto que este tipo de figuras comezaron a aparecer no cambio de era, isto é, no período romano-castrexo, pero seguiron tallándose en épocas moi posteriores. «É un motivo que se repetiu durante a Idade Media e que aparece incluso en construcións dos séculos XVIII ou XIX, así que sería moi aventurado adscribila a unha época concreta se non temos máis punto de referencia», comenta.
Nas proximidades de Pinol encóntrase o castro das Medorras, pero a falta de máis indicios arqueolóxicos, non se pode afirmar que a pedra tallada fose traída dese lugar cando se construíu a casa, que ten unha antigüidade considerable.
Foto: O COLADO DO VENTO. |
Achado casual
A peza foi descuberta casualmente por Alfonso Campos, membro da asociación cultural O Colado do Vento, cando mostraba a igrexa de Pinol a un grupo de visitantes. «Pasei por ese mesmo sitio moitísimas veces e nunca me fixara no relevo pero esa vez vino con claridade, seguramente porque a luz do sol axudaba nese momento a distinguir mellor os trazos», explica. Afeccionado á arqueoloxía, Campos notou a semellanza coas esculturas castrexas. «É case idéntica a unha peza achada no castro de Barán, en Paradela, que agora está no Museo Provincial de Lugo», engade.
Sem comentários:
Enviar um comentário