Ruta: A PROENCIA DAS LENDAS.

O roteiro comeza en Proendos, a 2 km de Sober pola estrada que une a capitalidade municipal con Doade.Proendos é un museo ó aire libre. Aconsellamos, antes de iniciar a andaina, percorrer este fermoso pobo. Atoparémonos nas estruturas das casas con moitos elementos reutilizados do antigo asentamento romano diseminados nun amplo espazo. Atopáronse os paisanos con pedras labradas, algunhas con molduras ou debuxos (trisqueles, rosetas, aras, motivos curvilíneos e xeométricos), con basas, fustes, muíños de man circulares, ademais de tégula, fusaiolas, ladrillo, lousa, anacos cerámicos, escorras metalúrxicas, utensilios metálicos, canalizacións, etc.
Resulta lóxico que os abundantísimos vestixios castrexo-romanos sementaran na imaxinación popular as lendas sobre a fabulosa Proencia.Gozaremos, tamén, da arquitectura nobiliaria da casa dos Ojeas, do s. XVII, dos Vertunías, ou a próxima de Vilastrille, fundada no 1692 por Feijóo Soutomaior.Os primeiros petroglifos a visitar atópanse á nosa dereita na chamada finca do Xestal, nunha casa particular co nº 103.Seguimos a andaina entre os valos do igrexario onde, á nosa esquerda, no muro, hai unha inscultura de orixe castrexo-romana.
Na finca do Pombal está outro petroglifo, ó pé do pombal.Estamos agora diante da igrexa románica (s. XII) de Santa María, na que a rusticidade e sinxeleza do presbiterio, engalanado con pinturas murais do s. XVI, lembra á arte prerrománica.
Xiramos polo camiño da dereita ata o Campo das Olas, volvendo xirar á dereita para seguir ata Froxán. Á esquerda, nos lameiros, están os petroglifos de Os Lagos, con coviñas.
Xa no pobo de Froxán, a 0,9 km, atopamos outra inscultura rupestre asentada na parede dunha casa.
Camiño de Mer, na entrada do pobo, á esquerda, xunto a unha fonte, collemos o camiño tradicional xunto ó cruce do camiño a Gundivós, collendo logo á esquerda pola Calzada de Pedride; á esquerda, a Phi de Pedride.
Ó final do camiño, o punto de orixe: a mítica Proencia.

* Fotos: Alfonso Campos.
* Mapa: Javier Vivirido. Clique sobre a imaxe para agrandala ou solicite o mapa ou tríptico en javivivirido@terra.es
- También disponible en castellano. Solicite el mapa o tríptico en javivivirido@terra.es.
- Also available in english (thanks to Hyllary Parks). Request the map and the text on paulaverao@hotmail.com

Ruta: CAMIÑANDO POLA RIBEIRA DE AMANDI.

* Mapa: Javier Vivirido. Clique sobre el ou solicíteo no correo javivivirido@terra.es para ter unha resolución maior da imaxe.
* Descargue aquí o texto da ruta.

A ruta foi deseñada por Alfonso Campos e Javier Vivirido, da Asociación Cultural O Colado do Vento, ca colaboración da Asociación Veciñal de Doade, especialmente de Antonio R. Álvarez.

COMUNICADO DA XUNTA DIRECTIVA



As afirmacións da concelleira de Turismo de Sober sobre a Asociación O Colado do Vento son infames e ridículas, e descalifícanse por si mesmas (aquí).
A Asociación foi quen, con moito traballo e co esforzo de máis de dous anos, sen ningunha axuda institucional (a única axuda das administracións foi para a edición en papel das rutas) percorreu o territorio, deseñou o trazado das rutas de sendeirismo, desbrozou camiños, consultou ca xente da zona, sacou fotografías e elaborou mapas.
As rutas O COXO DE BULSO, PROENCIA DAS LENDAS, O PAÍS DOS IBIOS e O PRODIXIOSO SALTO DO CABALO DE SANTIAGO son totalmente orixinais.
Ademais, da ruta VIÑEDOS DA RIBEIRA SACRA, que, efectivamente, está homologada, tan ben pensada pola Asociación Irmandade da Ribeira Sacra e polas casas de turismo rural, foi aportar un mapa, textos, engadirlle á ruta o punto de petroglifos de Anllo e darlle como idea central o pintor de Castinande. A ruta CAMIÑANDO POLA RIBEIRA DE AMANDI foi feita ca colaboración da Asociación de Veciños de Doade e, en especial, de Antonio R. Álvarez. Esta ruta, á que engadimos a sinalización no mapa de castros e petroglifos, aproveita, claro, camiños de viticultores que son xa usados tamén en visitas turísticas, mais non entendemos que problema hai con esto. A ruta dos colados foi unha idea xurdida no 2006 de dúas persoas de O Colado do Vento e da Asociación de Veciños de Bolmente, que nunca reclamaron a ninguén, como é lóxico, a propiedade intelectual do deseño da ruta, feita co obxectivo de recuperar os camiños tradicionais do río e os nomes propios da ribeira, para o cal preguntamos á xente maior de Bolmente.
Tamén fixemos un tríptico sobre os PETROGLIFOS DE SOBER, entendendo que un patrimonio tan importante merecía un folleto explicativo actualizado e un mapa.
Efectivamente, a ruta dos muíños DO XABREGA foi creada por un Obradoiro de Emprego do Concello de Sober. O que fixo a Asociación foi facer un mapa e un texto explicando o patrimonio da zona, en galego, castelán e inglés.

A nosa Asociación prestouse a colaborar co Concello de Sober, ofrecéndolle entregarlle á institución local gran cantidade de trípticos, proposta de colaboración moi ben acollida polo alcalde José Gómez, a quen agradecemos o seu interese xa que, queremos lembrar, o Concello non dispón de folletos con mapas detallados para orientarse polo patrimonio de Sober e só oferta tres rutas de sendeirismo (Muíños do Xabrega – Ruta Sur do Camiño de Santiago – Viñedos da Ribeira Sacra) e unha polos miradoiros en coche. Ademais, todos sabemos que son moitas as persoas que se achegan a Sober preguntando polos Petroglifos e non se lles poden ensinar, ben porque non hai mapas correctos, ben porque a oficina de turismo esté pechada, ben porque nas rutas que oferta o Concello de Sober non aparece este patrimonio.
O que engaden as rutas do Colado do Vento son mapas ben confeccionados, cos cales unha persoa pode orientarse sen guía; engaden a traducción a castelán e inglés de varias rutas; engaden a sinalización e explicación dos fitos patrimoniais máis importantes, ignorados polas administracións; engaden rutas en torno a unha idea, a un leit motiv que trata de introducir ao camiñante no entorno, non só físico, senon tamén ideolóxico-cultural. Entendemos que estas ideas deben ser compartidas ca sociedade e así o fixemos desinteresadamente; entendemos que esto beneficia a todos os implicados no sector turístico, como nos instou a facer Mari Carmen Agrelo; entendemos, tamén, que tantos anos de estratexia turística e de xente cobrando das administracións co fin de desenvolver turísticamente este territorio, deberon ter tido un reflexo moito maior.

Así, a Asociación Cultural O Colado do Vento puxo o seu esforzo non remunerado para contribuir ao desenvolvemento turístico do noso pobo. Por iso, agardamos unha rectificación pública da Concelleira de Turismo de Sober, por respecto á xente da Asociación, que adica o seu tempo desinteresadamente a divulgar o patrimonio da zona, e por responsabilidade, xa que é fundamental a colaboración entre todos os axentes implicados no Turismo.

XUNTA DIRECTIVA – O COLADO DO VENTO

RUTAS DE SENDEIRISMO

* Solicítenos os mapas das rutas ou os trípticos nos enderezos electrónicos javivivirido@terra.es ou paulaverao@hotmail.com; os mapas poden enviarse vía internet.

- RUTA DOS COLADOS -
Impresionante ruta de sendeirismo pola ribeira de Bolmente percorrendo os "colados", puntos da ribeira ata onde se podía chegar cos carros. A ruta recupera os nomes propios do territorio, a microtoponimia creada polas xentes que secularmente humanizaron a paisaxe ribeirá, e rememora os distintos traballos que facían desta ribeira unha zona productivísima.
* Máis info (aquí).
- Lonxitude: 9 km.
- Desnivel: 100 m.
- Tempo: 220 minutos.

- O COXO DE BULSO -
Ruta circular, moi sinxela, polas parroquias de Santiorxo, Bulso, Santa Cruz, Lobios e Pinol, coa historia do misterioso personaxe do s. XVIII coma nexo de unión.
* Máis info (aquí).
- Lonxitude: 12,3 km.
- Desnivel: 153 m.
- Tempo: 260 minutos.

-A PROENCIA DAS LENDAS -
Ruta polo pobo de Proendos, un museo ó aire libre, onde podemos atopar multitude de elementos romanos reutilizados na súa arquitectura tradicional ben conservada. A ruta enlaza os oito puntos de petroglifos coñecidos nesta parroquia e aproveita para sinalar elementos romanos, a igrexa románica, casas grandes, hórreos, pombais e outros puntos de interese que se van atopando polo camiño.
* Máis info sobre Proendos (aquí) e sobre a ruta (aquí).
- Lonxitude: 2,9 km.

- MUÍÑOS DA XABREGA -
Ruta que percorre un sendeiro recentemente creado entorno ó regato da Boca, onde se atopan as estructuras, algunhas restauradas por un Obradoiro de Emprego, de numerosos muíños.
É unha ruta de gran valor etnográfico, pola presenza de distintos tipos de muíños, histórico, por atoparse ó final do camiño un castro que controlaba a ponte romana sobre o Sil, e natural, pola gran variedade de especies florísticas de clima transicional atlántico-mediterráneo e a existencia dunha impresionante fervenza que forma o río ó caer no Sil.
- Lonxitude: 1,9 km.
- Desnivel: 160 m.
- Tempo: 45 minutos.

- O PAÍS DOS IBIOS -
Percorrido por Pinol que enlaza os catro puntos de petroglifos coñecidos nesta parroquia. Aprovéitase o camiño para ver o interesante románico de Pinol, os pobos de Cimadevila e Sampil, co encanto do tradicional ben conservado, ou O Castriño, cunha impresionante vista sobre o Sil. E, tamén, para rememorar as antigas lendas, coma a que conta que os ibios, descendentes de Noé, da estirpe de Breogán, chegaron polo Sil e fundaron a Ibia, nas abas de Chanteiro, ubicación dunha desaparecida villa romana.
* A lenda dos ibios (aquí).
- Lonxitude: 3,2 km.

- O PRODIXIOSO SALTO DO CABALO DE SANTIAGO -
Ruta que reproduce o salto que o albo cabalo de Santiago deu dende a Pena do Baldeiros, en Anllo, ata as Cerdeiriñas, por baixo dos Penedos do Castro, en Nogueira de Ramuín, do outro lado do Sil.
Serve esta ruta para recuperar a tradicional unión das dúas marxes do río, rota pola construcción do encoro de Santo Estevo.
Puntos de interese: petroglifos da Tapada do Monte, pobo e capela da Barca, Entrambasaugas (confluencia de Cabe e Sil), mosteiro de Santo Estevo, Pena das Cerdeiriñas, Castro dos Penedos, A Paixón, pobo e igrexa de Pombar.
* Máis info (aquí).
- Lonxitude: 10,2 km.

- SENDEIRO VIÑEDOS DA RIBEIRA SACRA -
Ruta pola ribeira do Cabe que enlaza a Casa Grande de Rosende ca Rectoral de Anllo, ambas as dúas adicadas ó Turismo Rural, rematando no Cotarro do Castro.
- Lonxitude: 11,5 km.
- Desnivel: 300 m.
- Tempo: 4 horas.

- DE SOUTO CHAO A CADEIRAS -
* Máis información aquí.
- Lonxitude: 8 km.
- Desnivel: 170 m.
- Tempo: 3,5 horas.

A Asociación Cultural O COLADO DO VENTO tén o pracer de convidalo/a á presentación de folletos turísticos de RUTAS DE SENDEIRISMO por SOBER.
Trátase de 8 rutas de sendeirismo por Sober, de escasa dificultade, das que se elaboraron trípticos con mapas, que percorren os puntos máis interesantes do Patrimonio soberino a todos os niveis (arqueolóxico-artístico-etnográfico-medioambiental). As rutas soen ter un leit motiv que lles dá unidade.
O material foi elaborado pola Asociación O COLADO DO VENTO, tanto o deseño das rutas (salvo a ruta Viñedos da Ribeira Sacra), coma a fotografía, os textos explicativos, os mapas e a maquetación, e foi financiado pola Consellería de Innovación e Industria no ano 2008. Fundamentalmente son obra de Alfonso Campos e Javier Vivirido, aínda que contamos ca axuda de distintas persoas ás que agradecemos a súa colaboración.
Queremos divulgar este material entre os axentes turísticos da zona e persoas implicadas, tomando estes trípticos como punto de partida dun proxecto que inclúa a sinalización das rutas, a súa divulgación, a integración das xentes de Sober no deseño da estratexia turística para o seu territorio, etc.
* Acceda ó resumo das rutas de sendeirismo aquí.

OS CASTROS DE SOBER





Aquí pode ver a publicación Os castros de Sober: guía introductoria, cun mapa e imaxes de elementos da cultura material dos castros de Sober e notas sobre cada un dos 23 poboados castrexos catalogados en Sober. Tamén pode acceder aquí.
Pódese solicitar un exemplar en papel (@s soci@s e as persoas que acudiron á visita aos castros do xa teñen un exemplar gratuito reservado, o resto das persoas que soliciten este folleto deberán facer unha aportación de 2 €).

III ROTEIRO Á LUZ DA LÚA...

Fomos case medio cento de persoas as que andivemos a noite do 7 de Agosto perdidos por Sober sen ver a lúa polo nubrado que había.

Visitamos a Pena da Virxe en Cadeiras, o Castro das Penas en Arxemil e a Cova da Vella, nos Chancís.

Ademais de poemas de Manuel María e Uxío Novoneyra, a quenes estaba adicado o roteiro, léronse composicións de Rosalía de Castro, Curros Enríquez, Celso Emilio Ferreiro, Lois Pereiro ou Miguel Hernández, así coma poesía dos propios asistentes.

Para a música, contamos con dous intrumentistas de trompa e tuba, ademáis de membros do grupo O Trícole.

Tamén agradecemos a compaña da poetisa Carmeliña, premio de declamación a nivel estatal, que recitou varios dos poemas.

En breve estará a disposición na web un libriño con todas as fotos do roteiro e textos que se leron.

Un saúdo e obrigad@s pola vosa asistencia!!!

III ROTEIRO Á LUZ DA LÚA

III Roteiro Músico-Poético á luz da lúa
7 - Agosto - 2009
Saída de Cadeiras ás 11 da noite (para tomar uns pinchos ás 9 e media da noite en Cadeiras é preciso anotarse antes do 5 de agosto).

Visitaremos...


- Pena da Virxe de Cadeiras (Pinol).
- Castro de San Marcos (Arxemil).
- Muíño no Xabrega.
- Fervenza dos Chancís.

Haberá música e poesía, ao gusto dos asistentes, que poderán ler os poemas que desexen, contar un conto, explicar algo...
Este ano, adicámolo a Uxío Novoneyra (X cabodano da súa morte) e Manuel María (V cabodano).

FOTOS DA VISITA AOS CASTROS

* En breve estará a disposición na web un folletiño con fotos sobre os castros de Sober. A partir do 10 de Setembro pode reservarse un exemplar en papel.

VIAXE NO TEMPO AO MUNDO CASTREXO

- Percorrido por distintos castros de Sober, achegándose perto deles en bus, tratando de ofrecer unha visión global da cultura castrexa.

- Saída do bus.
* Sober - 10 horas [9:40 nas Casitas da Compañía en Monforte]

- Xantar castrexo en Cadeiras, xunto ao castro de As Medorras (prezo 15 € // 10 € para nen@s).

- É preciso anotarse antes do 29 de Xullo en:

paulaverao@hotmail.com ou no 637502035

SOBER - 1 - AGOSTO - 2009

--- Organiza: O COLADO DO VENTO.
--- Colabora: Área de Cultura da Deputación Provincial de Lugo.

DESCARGA AO VIVO

ESPECTÁCULO SOBRE REPERTORIO HISTÓRICO DE
COMPOSITORES GALEGOS EN CUBA

A Descarga ao Vivo chega a Europa
A xira do combo cubano-galego actuará en Coruña, Santiago e Vigo a finais de xullo. Músicos de recoñecido prestixio forman parte deste grupo xuntado para este espectáculo que xa actuou no Teatro Mella de Cuba en febreiro do 2008 durante a Feira do Libro de La Habana.
Descarga ao vivo é un espectáculo musical que xunta artistas de Galiza e Cuba redescubrindo a enorme riqueza que atesoura este patrimonio musical compartido. Deseñado e producido por aCentral Folque - Centro Galego de Música Popular, é unha proposta escénica de música instrumental, canción e danza con artistas profesionais galegos e cubanos. Un percorrido por composicións históricas de autores emigrados á illa dende finais do século XIX e novas creacións dos propios músicos da ensemble.
A Descarga ao Vivo foi presentada nun concerto en Febreiro dentro da ‘Feria Internacional del Libro de La Habana 2008’. Os seus protagonistas reuniranse de novo onde farán unha serie de actuacións polas cidades galegas e gravarán un disco ao vivo. O profesor de aCentral Folque, Ramón Pinheiro, desprazouse no 2007 durante un período de catro meses a Cuba. Alí realizou un traballo de investigación sobre os vínculos musicais compartidos, moi notábeis tendo en conta que os galegos foron o principal pobo inmigrante na historia contemporánea cubana. Froito desa investigación é o libro “A la Habana quiero ir. Los gallegos en la música de Cuba” recentemente publicado.

Podes escoitar cancións, ver extractos do concero e atopar entradas AQUÍ.
Intérpretes musicais
Alejandro Vargas - Piano e teclados
Raciel Jiménez - Batería
Ernesto Vega - Saxo e Clarinete
Adonis Rios - Percusións
José M. Díaz - Contrabaixo e baixo eléctrico
Pedro Pascual - Acordeón diatónico e bouzouki
Marcos Teira - Guitarra flamenca
Edelmiro Fdez - Gaita
Óscar Fdez - Sanfona
Quim Farinha - Violino
Gutier Álvarez - Violino
Xabier Díaz - Voz e percusión
Ugia Pedreira - Voz
Guadi Galego - Voz


Repertorio
Alborada galega - Pascual Veiga
Cuba-Galicia - Guillermo M. Tomás
Un adiós á Mariquiña - José Castro Chané
Empanada de pollos - Rep. Quinteto Monterrey-Edelmiro Fdez
O Indiano - Ricardo Fortes Albarellos
Del Ferrol a La Habana - Juan Parga
Hermoso cielo cubano/Caldeliñas - Antonio Rdez Álvz -Repert.Quinteto Monterrey
[Antonio Rodríguez é "o Rei", director da Banda de Música e Alcalde de Sober elixido en febreiro de 1936 que, tras o golpe militar de xullo, se exiliou a Cuba, onde foi recoñecido o seu labor como compositor, sendo as súas pezas das máis interpretadas e radiadas do país. Teremos este xullo, gracias á labor de aCentral folque, dos intérpretes do concerto e, en especial, de Ramom Pinheiro, o privilexio de escoitar por primeira vez en Galicia obras súas].
2ª Guajira - Manuel Quiroga Losada
Danzón - José F. Vide
Miña Ruliña. Habaneira - Popular Galicia
Rumbas - Popular - Cuba/Galiza

ROTEIRO: RIBEIRA DO AMANDI 31-MAIO-09

Partimos de Souto Chao, con vistas á Pena do Castelo, por pistas entre as viñas, deixando atrás o castro das Borreas ata chegar á Tenencia, en Amandi. Ca Castrela á esquerda, fomos baixando ata o miradoiro dos Chelos, para coller logo outra pista que nos levou ata o Souto de Chanteiro, localización dunha vila romana, onde se atopan vestixios castrexos e romanos a esgalla, a carón da mítica Ibia dos homes grandes e fortes que subiron polo río e fundaron o pobo. A calor fixo que nos viñese buscar o bus a este lugar (só uns cantos intrépidos seguiron a pé ata Cadeiras), parando, de paso, no entorno de Sampil para ver os petroglifos do Barcal, perto do Castriño. Achegámonos logo a Cadeiras para o xantar, gardados polo castro das Medorras, a Pena da Virxe e o santuario inconcluso do s. XVIII.

Foron 5 km, catro parroquias, cinco castros e moita calor nunha xornada entre amig@s que deu comezo ás actividades de O COLADO DO VENTO deste verán.

Un saúdo a tod@s @s participantes, ós que non puideron vir e a todas as persoas que colaboraron connosco nesta actividade.

* Por certo, o gañador do sorteo dunha peza de cerámica de Gundivós é Germán López Quiroga. Parabéns.

Sober, maio de 2009.
O 31 de maio, imos de camiñata pola ribeira de Amandi, nun percorrido que discorre a carón do Sil polas parroquias soberinas de Doade, Amandi e Pinol; 8 quilómetros con inicio en Souto Chao e remate en Cadeiras, onde xantaremos.
Os elementos de interese deste roteiro son a beleza da natureza, a cultura do viño que se manifesta na propia paisaxe, os cinco castros que dominan o percorrido, os petroglifos de Sampil, as evidencias de época romana ou as mil e unha historias desta humanizada ribeira que, segundo contou o Constante de Portabrosmos, foi poboada polos ibios, homes grandes e fortes que subiron polo río.
Un saúdo.
O COLADO DO VENTO.
* Máis información aquí.

ENQUISA: ACTIVIDADES DO 2008

Dende O COLADO DO VENTO queremos avaliar o grao de interese que espertaron as nosas actividades na sociedade. Para iso, habilitamos neste recanto da Rede unha enquisa sobre as actividades e proxectos acometidos pola Asociación durante o ano 2008.
Podedes participar enviando as respostas á enquisa á dirección de correo paulaverao@hotmail.com.
Entre as respostas enviadas sortearase unha peza de olería de Gundivós.

ENQUISA

a. Elixe entre as seguintes a actividade ou proxecto de O COLADO DO VENTO que che parecese máis interesante:

1-Ruta de Sendeirismo: O PRODIXIOSO SALTO DO CABALO DE SANTIAGO (ver).
2-IIº ROTEIRO Á LUZ DA LÚA (ver).
3-UNHA VISITA Ó ROMÁNICO DE SOBER (ver).
4-Publicación de UN POUQUIÑO DE TRADICIÓN ORAL (ver).
5-A propia WEB de O COLADO DO VENTO.

b. Valora, asignando números do 1 ó 5, as actividades anteriores.

c. Dinos que publicación de O COLADO DO VENTO che parece máis interesante (ver publicacións).

d. Valora, asignando un número do 1 ó 5, as seguintes seccións da páxina web.

- LENDAS
- PETROGLIFOS
- PUBLICACIÓNS
- SENDEIRISMO
- ACTIVIDADES
- GALICIA TRIP
- GALERÍA

* Para realizar o sorteo asignarase, por orde de chegada, un número de tres cifras (000, 001, 002 ...) a cada mensaxe enviada (só unha desde cada dirección de correo electrónico). Gañará a mensaxe co número cuias dúas últimas cifras correspondan cas dúas últimas cifras do sorteo da ONCE do sábado 30 de maio de 2009 (se participades máis de 20 persoas, pode haber máis dunha gañadora). Se ás dúas últimas cifras do sorteo non coincidiran con ningún dos números asignados, a gañadora será a persoa á que se lle asignase o número máis próximo.

ABRIL: MES DOS LIBROS

ENCONTRO LITERARIO CON LOIS DIÉGUEZ 22-abril-2009

XORNADA DE LECTURA COMPARTIDA 25-abril-2009

* Actividades do Club de Lectura "Pintor de Castinade" da Biblioteca Pública Municipal de Sober.

GALICIA TRIP

Este será o álbum de viaxes do Colado do Vento por Galicia (a real, non a administrativa), estampas do país que pretenden ser reflexo da riqueza cultural, natural e humana da nosa terra.
Pódense ver fotos e descripcións no seguinte enlace: GALICIA_TRIP

UN POUQUIÑO DE TRADICIÓN ORAL (II)

O COLADO DO VENTO edita, ca colaboración do Grupo O TRÍCOLE, o segundo volume do libriño Un pouquiño de Tradición Oral no Concello de Sober II, escolma de lendas, contos, cantos e outras formas de Cultura oral recollidas das xentes de Sober.
Xa está lista a edición en papel desta obra, que recibe unha axuda da Consellería de Cultura e Deporte da Xunta de Galicia; mais tamén quixemos aproveitar as posibilidades das novas tecnoloxías poñendo esta pequena selección dun enorme traballo de recolleita oral na web da Asociación [acceder á publicación AQUÍ], a disposición de tod@s @s interesad@s.

* Pódese pedir un exemplar en papel en paulaverao@hotmail.com



LIMIAR

Hai anos, no 2002, o Grupo O TRÍCOLE e O COLADO DO VENTO editamos un libriño chamado Un pouquiño de Tradición Oral no Concello de Sober, pequena escolma de lendas, contos, cantos e outras manifestacións da Cultura oral das nosas xentes.

O impulso que motivou aquela publicación e que motiva a recollida da tradición oral está hoxe aínda máis vivo: o vertixinoso cambio nas comunicacións humanas e a progresiva perda de poboación que converteu a Sober no municipio estatal de máis dun millar de habitantes máis envellecido.

Ademais, outro motivo de facer esta segunda edición de Un pouquiño de Tradición Oral…, con máis mostras da nosa Cultura tradicional, é o feito de que aquel pequeño libriño do 2002 é un dos máis consultados na Biblioteca Pública Municipal e un dos máis reclamados polas xentes de Sober.

Xa que logo, ofrecemos este Un pouquiño de Tradición Oral II agardando que as nosas tradicións gocen de boa saúde, isto é, que sigan transmitíndose, estudándose, valorándose… en fin, que dende o noso propio ser sexa dende onde construamos o noso futuro.

O TRÍCOLE. O COLADO DO VENTO