Viaxe a Meira e a Viladonga: crónica

 

O domingo 23 de marzo de 2025 a Asociación Cultural O COLADO DO VENTO visitamos Meira e Viladonga.

En primeiro lugar, realizamos unha magnífica visita guiada á igrexa de Meira - do antigo mosteiro cisterciense -, da man da técnica da Oficina de Turismo de Meira.

O mosteiro foi fundado a mediados do século XII, aínda que se cre que podería xa existir un mosteiro anterior.

En todo caso, o abade Don Vidal é o primeiro cisterciense e é baixo o cal se incorpora o mosteiro de Ferreira de Pantón ao Císter.

 

A igrexa é de planta de cruz latina con tres naves, divididas en 9 tramos, respondendo ao esquema cisterciense. A cabeceira presenta ábside semicircular, tras o cal se construíu no século XVII unha sala das reliquias, á que se accede por un deambulatorio.

 

 

O mosteiro é a orixe da vila de Meira e a súa estrutura e toponimia reflexan este feito, mais foi saqueado polas tropas francesas en 1809 e a vida monástica rematou en 1835 coa desamortización, disgregándose o patrimonio do mosteiro. Do mosteiro queda a igrexa e dependencias que son hoxe a sede municipal. 

 Gustáronnos moito os retablos, o sepulcro feito por Dona María de Bolaño e a porta principal.

Despois da visita, achegámonos ao Pedregal de Irimia, na Serra de Meira. A auga aflora entre pedras procedentes dunha morrena glaciar.

Tras un magnífico xantar en Casa Cazoleiro, a xornada rematou no Castro de Viladonga.

 

 

Fotos cortesía de persoas socias.

Ruta xeolóxica. As rochas de Sober: que Historia contan?

 

O Colado do Vento organizamos unha nova ruta xeolóxica co xeólogo Eduardo González Clavijo.

Será o domingo, 23 de febreiro de 2025.

Pola mañá, charla teórica na Casa da Cultura de Sober de 12 a 13:30 h.

Pola tarde, saído de Sober ás 15:30 h, visitaremos en coches particulares rochas e paisaxes de Souto Chao (Doade), Anllo e Nogueira (Anllo Santo Estevo).

Non é preciso anotarse. O xantar corre por conta de cada quen.